السؤال يمكن غريب شويه بس مهم اوي اوي
اول حاجه بترموا زيت القليه المستعمل فين
معظمنا كان بيرميه ف الحوض بس طبعا ده خطر اوي لانه غير انه بيسد الحوض كمان هو من الاسباب الاساسيه في انسداد شبكات الصرف عندنا ف مصر
اومال نرميه فين؟
تجيبي كيس بلاستيك جامد زي بتاع الساندويتشات وتفضي فيه الزيت وتربطيه وترميه في الزباله بس اتاكدي ان الكيس مش بينقط
وده كمان تعمليه مع بواقي الاكل خصوصا السوايل زي الطبيخ والملوخيه وبدل ما تفضيها في كيس الزباله مباشره ويفضل ينقط علي السلم وانتو رايحين ترموها
الحاجه التانيه هي تفل الشاي وده كارثة لانه مش بيدوب بسهوله ويتراكم في مواسير الصرف بتاعه الحوض ويسده مع الوقت ومش بينفع معاه غير ان المواسير تتفك لتسليك الحوض
والحل؟
تحطي مصفاه بلاستيك زي اللي بتيجي طقم كام واحده جوا بعض دي اكيد عارفينها خدي اكبر واحده فيهم وخليها دايما في الحوض
اي تفل اوبواقي الاكل البسيطه في الاطباق وانتي بتغسلي المواعين فضيها جواها وفي اخر اليوم فضيها في الزباله واشطفيها
طيب لو بتشتكي من ان حوضك بيتسد كتير تعملي ايه
تفضي فيه كميه كلوركس كبيره قبل ما تنامي وتسيبيه لحد الصبح وما تفتحيش المايه خالص لحد الصبح هتلاقي الحوض اتسلك وكمان بيبرق بس بشرط لما تعملي كده يكون الحوض فاضي ما فيهوش مايه خالص عشان الكلور يبقى مركز
وحتى لو حوضك ما بيتسدش اعملي فكرة الكلور دي مره في الاسبوع عشان تحافظي عليه
المزاج
الخميس ديسمبر 24, 2009 6:25 pm
