:.:.:.:.:.:.:.:.:.:
دهون متراكمه :
لقيت إن أفضل شىء ليها هو (الكولونيا)
مثلا لو سيراميك أو رخام أو أسطح معدنيه أو حتى لتلميع أى حاجة انتي بتلمعيها .. ترشي كمية و تمسحي بفوطه ..
هاتلاقي إن الموضوع سهل أوي أوي..
ملحوظه"
في ناس بتحب تستخدم الجاز للتلميع .. هو كويس بس طبعا خطر جدا و ده غير ريحته اللي بتسبب أضرار بالجهاز التنفسي (نسأل الله السلامه)
:.:.:.:.:.:.:
سائل مذهل للتنظيف:
كنت أخدتها من بنوته ربنا يكرمها ،هى بتزود السائل مثلا ميه و تشتغل بيه بعد كدة
أنا بدأت أجرب إني أحط لسائل الصحون (خل شويه صغيره +ملح (قليل)+قشر ليمون)
بجد بجد راااااائع والله و جربوه
هاتلاقوا كمان ان ريحة الليمون بقت مركزة جدااا إلى جانب التعقيم طبعا هاتلاقوا لمعان غريب
.. بس تخلوا بالكوا إن القشر ما يفضلش كتير علشان ممكن يبوظ و يعمل ريحة وحشه يعني مثلا نشيله كل يومين او تلاته و نحط جديد .. او زى ما تشوفي انتى ..
:.:.:.:.:.:.:
سائل التنظيف بتاع الأرضيات و الأسطح المعدنيه و الحوائط:
و ده تستخدميه للبوتاجاز و الاحواض و كل شىء
هايبقى (سائل +شوية صغيرة كلور+خل+برسيل أو أى مسحوق +شوية معقم زى ديتول)
وترجيه كويس عند الاستخدام
.. و حاجة بعملها و اتعودت عليها و بحبها أوي ،، إني بحطه في بخاخ و استخدمه
بيسهل أوي التنظيف.. غير ريحة النظافه اللي بتبقى موجوده فى المكان طبعا..
:.:.:.:.:.:.:.:
في بخاخه مخصوصه للريحه و التنظيف في نفس الوقت
بملاها ميه +ماء ورد شويه+أى زيت عطري لو موجود أو ممكن استغنى عنه+
داوني أو كومفورت+نقطتين ديتول + نقطتين كولونيا
:.:.:.:.:.:.:
فكرة للتعطير:
سهله اوى و عمليه لو كان في ضيوف و عايزة تخلي ريحة الأكل تمشي بسرعه
و دي أخدتها برضو من أخت ربنا يكرمها
تملي حلة مش عايزاها (مثلا صاج أو كدة) ميه و تحطي فيها مجموعة زيوت عطريه زى ما تحبي .. و تكتري لغاية ما تحسي ان التركيز صحيح
و ساعات أنا من كتر ما بحب أعطر الجو احط صفيحه كدة ( صفيحه من علبة سمنه او اى علبه عندك معدن) .. أحطها على النار مباشرة و أوطي و انقط نقط زيت عطري و ممكن مثلا رشة خفيفه قرفه و مستكه بتبقى حلوة اوووووى
:.:.:.:.:.:.:.:.:
تلميع الأثاث:
بصوا يا بنوتات .. في الصالونات بيبقى في دبابيس متثبت بيها القماش
بتبقى زى دبابيش المكتب كدة بس ذهبي او فضي او نحاسي مش عارفة فهمتوني و اللا لآ؟ !
دي بزعل اوى لما أبصلها و الاقيها فيها تراب مهما تقعدي تمسحي فيها كتييييير
برضو بتبقى مش متلمعه
انا دي جربت معاها حاجات كتير الصراحه و ملمع الاثاث و ملمع الزجاج حتى
و مافيش حاجة بتجيب نتيجه ترضي
آخر ما توصلت إليه و بجد بيبقى بيلمع أوي
تاخدي فرشة أسنان قديمه و طبق أو أى إناء و تحطي فيه شوية زيت صغيرين جدا
أى زيت .. و تبدأى تفرشي الدبابيس دي كويس أوي و بعدها تمسحي بقماشه قطن ناشفه.. بس تخلي بالك انك ما تمليش الفرشه زيت علشان ما ينقطش على الصالون نفسه .. تمرريها بالراحه في الزيت و بعدين تخبطي خبطات خفيفه كدة في الطبق علشان تنزلي الزايد ..
ويالله شوفي اللمعان
:.:.:.:.:.:.:.:
إن شاء الله هاجي تاني أكمل باقي الحاجات اللي عندي انتظروني يا حبايبي
لو أى تعليق اتفضلوا
أى إضافه ،،هاكون سعيده
المزاج
الخميس ديسمبر 24, 2009 6:27 pm
